सोमवार, कार्तिक १० २०८३११:३३
बंगालको खाडीमा विकसित गहिरो न्यूनचापीय प्रणाली चक्रवाती आँधी ‘अर्नब’मा परिणत भएको छ। सोमबार बिहान पश्चिमतर्फ सर्दै विकसित भएको उक्त आँधीका कारण भारतका आन्ध्र प्रदेश र ओडिसाका तटीय क्षेत्रमा भारी वर्षा, बाढी तथा डुबानको जोखिम बढेको छ।
भारतको मौसम विज्ञान विभागका अनुसार सोमबार बिहान साढे ५ बजे आँधी बंगालको खाडीको पूर्वमध्य तथा आसपासको पश्चिममध्य क्षेत्रमा केन्द्रित थियो। यो अन्डमान टापुको श्री विजयपुरमबाट ५९० किलोमिटर उत्तरपश्चिम, विशाखापट्टनमबाट ६५० किलोमिटर पूर्व–दक्षिणपूर्व र काकिनाडाबाट ७३० किलोमिटर पूर्व–दक्षिणपूर्वमा रहेको थियो।
उक्त आँधी सोमबार मध्यरातसम्म शक्तिशाली चक्रवाती आँधी र मंगलबार अति शक्तिशाली चक्रवाती आँधीमा परिणत हुन सक्ने पूर्वानुमान गरिएको छ।
भारतको मौसम विज्ञान विभागले बुधबार बिहान आन्ध्र प्रदेशको बापटला र विशाखापट्टनमबीचको तटीय क्षेत्रबाट चक्रवात जमिनमा प्रवेश गर्न सक्ने अनुमान गरेको छ। त्यसबेला हावाको गति प्रतिघण्टा ११५ देखि १२५ किलोमिटर र झोक्कासहित १४० किलोमिटरसम्म पुग्न सक्नेछ।
आन्ध्र प्रदेशका काकिनाडा, एलुरु, पूर्वी गोदावरी, पश्चिमी गोदावरी, एनटीआर र कृष्णा जिल्लामा भारी वर्षाको जोखिमलाई ध्यानमा राख्दै रेड अलर्ट जारी गरिएको छ। केही क्षेत्रमा २४ घण्टामा २०० मिलिमिटरभन्दा बढी वर्षा हुन सक्ने चेतावनी दिइएको छ।
चक्रवात तटमा पुग्ने समयमा समुद्री सतह बढेर होचा भूभाग डुबानमा पर्न सक्ने चेतावनी दिइएको छ। काकिनाडा र यानम आसपास सामान्य ज्वारको सतहभन्दा १ देखि १.५ मिटरसम्म समुद्री पानी बढ्न सक्ने अनुमान छ। यसले तटीय बस्तीमा बाढी र डुबानको जोखिम बढाउन सक्छ।
Be the first to comment!
© 2026 All right reserved to rastrakhabar.com
Site BY Sobij
युनिकोड
पात्रो
ताजा
लोकप्रिय
प्रतिक्रिया दिनुहोस