काठमाडौं । युद्ध अन्त्यका लागि अमेरिकाले दिएको पछिल्लो जवाफप्रति इरानले असन्तुष्टि व्यक्त गरेको छ। अमेरिकी प्रस्ताव अपर्याप्त रहेको बताउँदै इरानले युद्ध पुनः चर्किएमा क्षेत्रीय डेटा सेन्टर, सञ्चार केबल तथा कृत्रिम बुद्धिमत्ता (एआई) सम्बन्धी पूर्वाधारलाई निशाना बनाउन सक्ने चेतावनी दिएको छ।

इरानको सर्वोच्च राष्ट्रिय सुरक्षा परिषद्का प्रमुख मोहसेन रेजाईले अमेरिकाबाट प्राप्त जवाफमा थप स्पष्टता आवश्यक रहेको बताएका छन्। इरानको सरकारी समाचार संस्था आईआरएनएका अनुसार अमेरिकाले प्रस्तावका सात सर्तमध्ये केही स्वीकार गरे पनि सबै विषयमा सहमति जुट्न सकेको छैन।

यसैबीच, इरानी रिभोलुसनरी गार्डको नौसेनाले होर्मुज जलडमरूमध्यबाट आवतजावत गर्ने जहाजलाई आफ्नो नेभिगेसन तथा पहिचान प्रणाली बन्द नगर्न चेतावनी दिएको छ। प्रणाली बन्द गर्ने जहाजलाई शत्रुतापूर्ण मान्न सकिने उसको भनाइ छ।

इजरायलका पूर्व महान्यायाधिवक्ता अविचाई म्यान्डेलब्लिटले प्रधानमन्त्री बेन्जामिन नेतान्याहुविरुद्ध चलिरहेको भ्रष्टाचार मुद्दामा अदालतसमक्ष बयान दिएका छन्।

म्यान्डेलब्लिटले सात वर्षअघि नेतान्याहुविरुद्ध ठगी, विश्वासको दुरुपयोग तथा घुस लिएको आरोपमा अभियोग दायर गरेका थिए। नेतान्याहुले भने आफूविरुद्धका आरोप अस्वीकार गर्दै आएका छन्।

साउदी अरबको राजधानी रियादस्थित किङ खालिद अन्तर्राष्ट्रिय विमानस्थलको यात्रु टर्मिनलमा पुनः आक्रमण भएको छ। यसअघि भएको आक्रमणमा मानवीय क्षति भएको साउदी अधिकारीहरूले जनाएका छन्।

यमनका इरानसमर्थित हुथी विद्रोहीले आक्रमणको जिम्मेवारी लिँदै साउदी हवाई क्षेत्रमा उडान गर्दा हुन सक्ने जोखिमप्रति सचेत रहन आग्रह गरेका छन्।

यसैबीच, हुथीको नियन्त्रणमा रहेको अल–मसिरा टेलिभिजनले यमनको राजधानी सानामा पनि थप आक्रमण भएको जनाएको छ। हुथी पक्षले त्यसका लागि साउदी अरबलाई जिम्मेवार ठहर गरेको छ।

इजरायली आक्रमणबाट प्रभावित मध्य गाजाका बासिन्दा आफ्नो घरको अवस्था बुझ्न फर्किँदा ध्वस्त भवन र भग्नावशेषको सामना गर्नुपरेको छ।

स्थानीय बासिन्दा बसाम आबेदका अनुसार करिब ३०० परिवार बसोबास गर्ने कम्तीमा १० वटा आवासीय भवन ध्वस्त भएका छन्। इजरायली सेनाले भने हमासका लडाकुले प्रयोग गरेका रकेट प्रक्षेपणस्थल र कमान्ड सेन्टरलगायत सैन्य संरचनालाई लक्षित गरिएको जनाएको छ।

इजरायली प्रधानमन्त्री नेतान्याहुले ‘नाजा’ नामक वृत्तचित्रमा सहभागी व्यक्तिहरूबारे अनुसन्धान गर्न महान्यायाधिवक्ता र आन्तरिक सुरक्षा निकाय शिन बेटका प्रमुखलाई आग्रह गरेका छन्।

वृत्तचित्रमा इजरायली सेनासँग सम्बन्धित व्यक्तिहरूले गाजामा सर्वसाधारणको ज्यान जाने घटनाबारे आफ्ना अनुभव प्रस्तुत गरेका छन्। नेतान्याहुले वृत्तचित्रमा इजरायल र उसको सेनाबारे भ्रामक विवरण प्रस्तुत गरिएको आरोप लगाएका छन्।

लेबनानको सेनाका अनुसार दक्षिणी लेबनानको याटेर सहरमा आफ्नो सम्पत्तिको अवस्था बुझ्न गएका अवकाशप्राप्त सैनिक अधिकारी अली अब्दुल हसन स्वेइदानको इजरायली तोपको गोलाबारीमा मृत्यु भएको छ।

लेबनानी सेनाले घटनाप्रति आपत्ति जनाउँदै यसलाई विद्यमान समझदारीको उल्लङ्घन भनेको छ। इजरायली सेनाका प्रवक्ताले भने घटनाबारे आफूहरूलाई जानकारी नभएको बताएका छन्।

मध्यपूर्वका विभिन्न क्षेत्रमा जारी आक्रमण, प्रत्याक्रमण र कूटनीतिक असहमतिले क्षेत्रीय सुरक्षा तथा युद्ध अन्त्य गर्ने प्रयासलाई थप जटिल बनाएको छ।