शनिवार, कार्तिक ८ २०८३०३:५३
बढ्दो महँगी र ऊर्जा सङ्कटलगायतका विषयलाई लिएर शनिबार इटलीभर प्रदर्शन हुने भएपछि सरकारले प्रमुख सहरहरूमा सुरक्षा व्यवस्था कडा पारेको छ । सम्भावित हिंसा र झडप नियन्त्रण गर्न हजारौँ प्रहरी तथा सैनिक परिचालन गरिएको छ भने निगरानीका लागि मानवरहित विमानसमेत प्रयोग गरिने भएको छ ।
युरोन्युजका अनुसार इटलीका रोम, मिलान, बोलोन्या, जेनोआ, टुरिन र फ्लोरेन्सलगायत सहरमा प्रदर्शनको तयारी गरिएको छ । देशभर जुलुस, धर्ना, सभा र हडतालसहित ३० भन्दा बढी कार्यक्रम तय भएका छन् । रोममा करिब एक हजार ५०० र मिलानमा करिब एक हजार ८०० सुरक्षाकर्मी परिचालन गर्ने तयारी गरिएको छ ।
गत अक्टोबर १७ र १८ मा भएका प्रदर्शनका क्रममा हिंसात्मक घटना भएपछि सुरक्षा व्यवस्था थप कडा पारिएको हो । रोमका सार्वजनिक चोक र रेल्वे स्टेसनलगायतका स्थानमा सुरक्षा जाँच गरिनेछ । प्रहरीले सामाजिक सञ्जालमा भइरहेका गतिविधिमाथि पनि निगरानी राखिरहेको छ ।
इटलीकी प्रधानमन्त्री जर्जिया मेलोनीले अघिल्ला प्रदर्शनका क्रममा भएको हिंसाको निन्दा गर्दै सुरक्षाकर्मीप्रति समर्थन जनाएकी छन् । उनले प्रदर्शन गर्नु नागरिकको अधिकार भए पनि सहरमा आगजनी र तोडफोड गर्नु स्वीकार्य नहुने बताएकी छन् ।
मेलोनीले विपक्षी दलहरूलाई पनि हिंसात्मक घटनाको स्पष्ट रूपमा विरोध गर्न र शान्तिपूर्ण प्रदर्शनका लागि आह्वान गर्न आग्रह गरेकी छन् । प्रदर्शनका क्रममा पुनः हिंसा भड्किन नदिन सरकारले सुरक्षा निकायलाई उच्च सतर्कतामा राखेको छ ।
Be the first to comment!
© 2026 All right reserved to rastrakhabar.com
Site BY Sobij
युनिकोड
पात्रो
ताजा
लोकप्रिय
प्रतिक्रिया दिनुहोस