आइतवार, श्रावण ३ २०८३०७:३१
काठमाडौं । फ्रान्सका कप्तान किलियन एमबाप्पेले फिफा विश्वकपको इतिहासमा सर्वाधिक २२ गोल गर्दै नयाँ विश्व कीर्तिमान कायम गरेको दाबी गरिएको छ।
मियामीमा शनिबार राति भएको विश्वकप २०२६ को तेस्रो स्थानका लागि भएको रोमाञ्चक खेलमा इंग्ल्यान्डसँग फ्रान्स ६–४ ले पराजित भए पनि एमबाप्पेले व्यक्तिगत रूपमा ऐतिहासिक उपलब्धि हासिल गरेका हुन्। हारसँगै फ्रान्स चौथो स्थानमा सीमित रहँदा इंग्ल्यान्डले कांस्य पदक जित्न सफल भयो।
खेलको पहिलो हाफमा इंग्ल्यान्डले आक्रामक प्रदर्शन गर्दै ४–० को अग्रता बनाएको थियो। तर दोस्रो हाफमा फ्रान्सले उत्कृष्ट पुनरागमनको प्रयास गर्यो। कप्तान एमबाप्पेले ४८औँ मिनेटमा टोलीका लागि पहिलो गोल गर्दै खेलमा फर्कने संकेत दिएका थिए। त्यसको केही मिनेटपछि ब्राड्ली बार्कोलाले दोस्रो गोल थपेपछि फ्रान्सले अन्तर घटाएको थियो।
एमबाप्पेले ६६औँ मिनेटमा व्यक्तिगत दोस्रो गोल गर्दै विश्वकपमा आफ्नो कुल गोल संख्या २२ पुर्याएको दाबी गरिएको छ। यससँगै उनले अर्जेन्टिनाका लियोनेल मेसीको नाममा रहेको २१ गोलको कीर्तिमान उछिनेको उल्लेख गरिएको छ। जारी विश्वकपमा मात्रै एमबाप्पेको यो १०औँ गोल हो।
यस प्रदर्शनसँगै एमबाप्पे गोल्डेन बुटको दौडमा सबैभन्दा अगाडि देखिएका छन्। प्रतियोगिताभरि उनको र अर्जेन्टिनी स्टार लियोनेल मेसीबीच गोल्डेन बुटका लागि कडा प्रतिस्पर्धा भइरहेको उल्लेख गरिएको छ। समाचारअनुसार मेसीले जारी विश्वकपमा ८ गोल गरेका छन् र स्पेनविरुद्धको फाइनल उनका लागि एमबाप्पेको कीर्तिमान बराबरी वा पार गर्ने अन्तिम अवसर हुनेछ।
फ्रान्सका लागि ओसमाने डेम्बेलेले पनि एक गोल थपेका थिए। यता इंग्ल्यान्डको जितमा बुकायो साकाको ह्याट्रिक निर्णायक बन्यो भने जुड बेलिङ्घमले अर्को गोल गर्दै टोलीको जित सुनिश्चित गरेका थिए। बेलिङ्घमले जारी विश्वकपमा आफ्नो व्यक्तिगत गोल संख्या ७ पुर्याएको उल्लेख गरिएको छ।
तीन विश्वकप (२०१८, २०२२ र २०२६) खेल्दै एमबाप्पेले बनाएको यो उपलब्धि विश्व फुटबल इतिहासमा स्मरणीय रहने दाबी गरिएको छ।
Be the first to comment!
© 2026 All right reserved to rastrakhabar.com
Site BY Sobij
युनिकोड
पात्रो
ताजा
लोकप्रिय
प्रतिक्रिया दिनुहोस