पश्चिमी न्यून चापीय प्रणाली फेरि केही बलियो बन्दै मौसम बदली गराउन लागेको छ । गत मङ्गलबार र बुधबार भएको मौसम बदली, वर्षा र हिमपातपछि कोशी तथा मधेसबाहेकका क्षेत्रको जनजीवन प्रभावित भएको थियो । खुलेको मौसम एक हप्ता नबित्दै पुनः वर्षा गराउने प्रणाली सक्रिय हुन लागेको हो ।
आजदेखि नै सुदूरपश्चिम क्षेत्रमा यसको हल्का असर देखिन थालेको छ । उक्त प्रणाली सोमबार थप सक्रिय भई पश्चिम क्षेत्रका उच्च हिमाली तथा पहाडी भू–भागमा फैलिने र मङ्गलबार मध्य नेपालसम्म विस्तार हुने जल तथा मौसम विज्ञान विभाग, मौसम पूर्वानुमान महाशाखाका मौसमविद् सञ्जीव अधिकारीले जानकारी दिए । ती क्षेत्रमा पूर्ण बदली रहने र अन्य भू–भागमा पनि आंशिक बदली भई चिसो बढ्नेछ ।
अघिल्लो बुधबारको जत्तिको बलियो प्रणाली नभए पनि पश्चिम नेपाल पहिले नै चिसो भइसकेको र हिमपात भइरहेको अवस्थामा अब सक्रिय हुने प्रणालीले पनि मध्यमसम्मको वर्षा तथा हिमपात गराउने अधिकारीले बताए ।
उनका अनुसार प्रणालीले मध्य नेपालभन्दा पश्चिम क्षेत्रमा बढी असर गर्ने देखिन्छ । कर्णाली र सुदूरपश्चिमका विभिन्न स्थानमा देखिएको बदली क्रमशः बढ्दै जाने र मङ्गलबार मध्य नेपालभन्दा पश्चिममा बदली भई वर्षा तथा हिमपातको मात्रा बढ्ने सम्भावना छ ।
मौसमविद् अधिकारीका अनुसार यस पटकको प्रणाली पश्चिमदेखि मध्य नेपालसम्म प्रभाव पार्नेछ । उच्च पहाडी तथा हिमाली भू–भागमा हिमपात र अन्य भू–भागमा हल्कादेखि मध्यमसम्म वर्षा हुने अनुमान छ । कोशी र बागमती प्रदेशका माथिल्ला भेगमा पनि असर पर्न सक्ने भए पनि तल्लो भेग, तराई क्षेत्र तथा मधेस प्रदेशमा भने असर न्यून रहनेछ । काठमाडौँमा मङ्गलबार राति छिटपुट वर्षा हुन सक्ने अनुमान गरिएको छ ।
सोमबार तराईका केही स्थानमा हुस्सु वा कुहिरो लाग्ने तथा हिमाली भू–भागमा सामान्यतया बदली रहनेछ । बाँकी भू–भागमा आंशिक बदली रहने अनुमान छ । हिमाली भू–भागका एक–दुई स्थानमा हल्का हिमपात वा वर्षाको सम्भावना रहेको महाशाखाले जनाएको छ ।
सोमबार राति तराईका थोरै स्थानमा हुस्सु लाग्ने र गण्डकी, लुम्बिनी, कर्णाली तथा सुदूरपश्चिम प्रदेशका हिमाली भू–भागमा सामान्यतया बदली रहनेछ । बाँकी भू–भागमा आंशिक बदली रहने र गण्डकी, कर्णाली तथा सुदूरपश्चिम प्रदेशका हिमाली भू–भागका एक–दुई स्थानमा हल्का हिमपात वा वर्षाको सम्भावना छ ।
मङ्गलबार दिउँसो हिमाली तथा पहाडी भू–भागमा सामान्यतया बदली रहनेछ भने बाँकी भू–भागमा आंशिक बदली रहनेछ । गण्डकी, कर्णाली र सुदूरपश्चिम प्रदेशका पहाडी तथा हिमाली भू–भागका केही स्थानमा मध्यम हिमपात वा वर्षा तथा अन्य हिमाली भू–भागका केही स्थानमा हल्का हिमपात वा वर्षाको सम्भावना छ । सुदूरपश्चिम प्रदेशका बाँकी भू–भागका थोरै स्थानमा तथा गण्डकी र लुम्बिनी प्रदेशका बाँकी भू–भाग र कोशी तथा बागमती प्रदेशका पहाडी भू–भागका एक–दुई स्थानमा हल्का वर्षा हुन सक्ने अनुमान गरिएको छ ।
राति हिमाली भू–भागमा सामान्यतया बदली र बाँकी भू–भागमा आंशिक बदली रहनेछ । गण्डकी, कर्णाली र सुदूरपश्चिम प्रदेशका पहाडी तथा हिमाली भू–भागका केही स्थानमा मध्यम हिमपात वा वर्षा तथा अन्य हिमाली भू–भागका केही स्थानमा हल्का हिमपात वा वर्षाको सम्भावना रहेको महाशाखाले जनाएको छ ।
