काठमाडौं । नेकपा (एमाले)का अध्यक्ष केपी शर्मा ओलीले नेपालमा अहिले ‘राक्षसीराज’ चलिरहेको टिप्पणी गरेका छन् । एमालेको जनवर्गीय संगठन नेसनल भोलेन्टियर्स फोर्सको स्थापना दिवसका अवसरमा शनिबार (मंसिर ५) काठमाडौंमा आयोजित कार्यक्रममा बोल्दै उनले यस्तो बताएका हुन् ।
राक्षसीराज कायम रहे नेसनल भोलेन्टियर्स फोर्स आन्दोलनमा उत्रने चेतावनीसमेत ओलीले दिएका छन् ।
आफू पूर्वप्रधानमन्त्री तथा पार्टी अध्यक्ष हुँदाहुँदै पनि बिना कारण १३ दिन हिरासतमा राखिएको उनको दाबी थियो । पार्टी अध्यक्ष पक्राउ परेपछि शान्तिपूर्ण आन्दोलनमा उत्रिएका कार्यकर्तामाथि सरकारले दुर्व्यवहार गरेको आरोप पनि उनले लगाए ।
अब शान्तिपूर्ण आन्दोलनमा सरकारले हस्तक्षेप गरे नेसनल भोलेन्टियर्स फोर्सले प्रतिवाद गर्ने ओलीको भनाइ थियो ।
नेसनल भोलेन्टियर्स फोर्स देखाउनका लागि मात्रै गठन नगरिएको उल्लेख गर्दै उनले उक्त संगठनले आफैँ कसैसँग निहुँ नखोज्ने बताए । तर, कसैले निहुँ खोजे चुप लागेर नबस्ने उनको चेतावनी थियो ।
प्रतिक्रिया दिनुहोस